د وزیر ژوند لیک

په پارلماني چارو کې د دولت وزير ګل بادشاه مجيدي لنډ ژوندليک

ښاغلی ګل بادشاه مجيدي د زرګل مجيدي زوی په ۱۳۴۶لمریز کال په خپل پلارني ټاټوبي پکتیا ولایت د اریوب ځاځي ولسوالۍ په شګه کلي کې نړۍ ته سترګې غړولې دي.

لومړنۍ او ثانوي زده کړې

ښاغلي مجيدي لومړنۍ او ثانوي زده کړې په ۱۳۶۱لمريز کال د کابل ولايت د سيد نور محمد شاه مېنې په عالي ليسه کې بشپړې کړې.

لوړې زده کړې:

ګل بادشاه مجيدي په علم پروره کورنۍ کې زېږېدلی دی، په هېواد کې د جګړو له امله تر کډه کېدو وروسته يې هم د علم او زده کړو لاره پرېنښوده او په ۱۳۷۵ لمريز کال کې یې د پاکستان هېواد له کراچۍ پوهنتون څخه د سياسي علومو په برخه کې د لېسانس تر کچې زده کړې بشپړې کړې.

همدارنګه دویم لیسانس یې په ۱۳۹۳ لمريز کال په کابل کې د ميوند له خصوصي پوهنتون څخه د اداره او تجارت (BBA) په برخه کې بشپړ کړ.

د دې تر څنګ ښاغلي مجيدي په هندوستان کې د پرتوکولونو او ډيپلوماټيکو اړيکو په برخه کې او همدارنګه د ياد هېواد په حيدرآباد ښار کې د ډيپلوماسۍ په برخه کې زده کړې تر لاسه کړې دي.

ژبې او نور مهارتونه:

ښاغلی مجيدي د هېواد د رسمي ژبو (پښتو او دري) تر څنګ په انګليسي، الماني او اردو ژبو هم روانې خبرې او ليکل کولی شي.

همدارنګه له نوې ټېکنالوژۍ سره بشپړه بلدتيا لري.

رسمي دندې:

محترم ګل بادشاه مجيدي له ښوونځي تر فراغت وروسته (له ۱۳۶۵ څخه تر ۱۳۶۷لمريز) کال پورې د عسکرۍ د مکلفيت دوره بشپړه کړه.

ښاغلي مجيدي خپل رسمي ماموريت د ښوونکي له مقدسې دندې پيل کړ او له دې وروسته یې د ۶ کلونو لپاره په پېښور کې د عثماني عالي ليسې د مدير په حيث دنده ترسره کړه.

هېواد ته تر راستنېدو وروسته يې په ۱۳۸۴ل کال کې د خپلو خلکو په پراخ ملاتړ د افغانستان ولسي جرګې ته لاره ومونده او د یاد مجلس په پنځلسمه تقنيني دوره کې د پکتيا د غيور ولس استازی وټاکل شو، چې په دې دوره کې يې د وکيلانو د حقوقو او امتيازاتو د کمېسيون د رياست او د مالي او بودجې د کمېسيون د غړي په حيث دنده ترسره کړه.

په پنځلسمه تقنيني دوره کې د ولس د ښه استازيتوب له امله يې د خپلو خلکو باور خپل کړ او د ۱۳۸۸ل کال په پارلماني ټاکنو کې د دويم ځل لپاره ولسي جرګې ته بريالی او د ملي شورا د شپاړسمې تقنيني دورې غړی شو، چې تر ۱۳۹۷ل کال پورې يې په ملي شورا کې د پکتیا د خلکو استازيتوب وکړ؛ په دې دوره کې يې د ولسي جرګې د نړيوالو اړيکو د کمېسيون د غړيتوب تر څنګ د کانونو او چاپيريال ساتنې کمېسيون د مرستيال په حيث دنده ترسره کړه.

په ملي کچه د نوموړی غوره کړنو او ښه مدیریت ته په کتو په ۱۳۹۹ل کال کې په ولسي، سياسي او عامه پوهاوي چارو کې د جمهوري رياست لوړ مقام د دفتر لوی رياست مرستيال وټاکل شو او د همدې کال د وږي میاشتې په ۴مه نېټه په پارلماني چارو کې د دولت وزير په توګه په دنده وګومارل شو.

غير رسمي فعاليتونه:

دا چې ښاغلی مجيدي يو فعال، ټولنيز او سياسي شخص دی، نو د رسمي دندو تر څنګ يې غير رسمي ټولنيز، سياسي او فرهنګي فعاليتونه نه دي پرېښي او تل يې د هېواد د فرهنګ د بډاينې او ټولنيز شعور د بيدارۍ لپاره له مدني او سياسي ټولنو او بنسټونو سره اړيکې ساتلې دي او د دغه ډول ځينو بنسټونو مؤسس پاتې شوی دی، چې له دې جملې يې په المان هېواد کې د پکتيا د بيا جوړولو د اتحاديې او مجيدي بنسټ (Majidi Foundation) رامنځته کول يادولی شو.

مډالونه او تقديرنامې:

ښاغلی مجيدي د خپلې کاري دورې په اوږدو کې په غوره توګه د خپلو کاري مسئوليتونو د ترسره کولو له امله د بېلابېلو رسمي او غير رسمي بنسټونو له لوري تقدير شوی دی، چې ځينې يې په لاندې ډول يادولی شو:

  • د ده د ښو خدماتو د تقدیر په پار د هېواد د پخواني ولسمشر حامد کرزي له لوري د مډال تر لاسه کول؛
  • د عربي او اسيايي هېوادونو د مختلطې پارلماني برنامې له لوري په پارلمان کې د خپلو خلکو د ښې استازولۍ له امله د سرو زرو مډال تر لاسه کول؛
  • د کار، ټولنیزو چارو، شهیدانو او معلولینو وزیر له خوا (د اصلاحاتو او ښې حکومتولۍ په لور) د ستاینلیک ترلاسه کول؛

پر دې سربېره د بېلابېلو وزارتونو، ادارو، مدني، سياسي او ټولنيزو بنسټونو له لوري د ګل بادشاه مجيدي خدمتونه او کار کړنې ستايل شوې او تقدير شوې دي.