په پارلماني چارو کې د دولت د وزیر پیغام

 

بسم الله الرحمن الرحیم

 السلام علیکم و رحمت الله و برکاته!

ډېر خوښ یم او د الله ج شکر ادا کوم چې د خپل ګران هېواد او قدرمن ولس د خدمت کولو لپاره یې یو نوی فرصت را په برخه کړ.

 لازمه یې بولم چې د جلالتمآب جمهور رییس د هغه اعتماد له امله ،چې پر ما یې کړی، مننه وکړم.

 د خدای ج په مرسته، د افغانستان د اسلامي جمهوري دولت د رهبرۍ په لارښوونه او د خپل کاري ټیم په ملاتړ به د دولت د درې ګونو ارکانو ترمنځ، ښه همغږي او مثمرې کاري اړیکې  رامنځ ته کړم.

کوښښ به مو دا وي چې په اړونده مسایلو کې مربوطه قواوې د معلوماتو په تشه کې واقع نشي؛ ځکه ډير کله د اطلاعاتو خلاء د بې اعتمادۍ سبب ګرځي.

په ټول توان به  له دوی سره په خپل وخت اړونده اطلاعات شریکوو. موږ به مقننې قوې ته د اجراییه قوې د چارو د منظمې اجنډا په وړاندې کولو او عملي کولو او بالمقابل اجراییه قوه کې د مقننه قوې د امورو مسلسل تعقیب ته د ځواب ویونکي کاري چهار چوب د چمتو کولو له پاره هڅې کوو.

له خپل کاري ټیم سره به د قانون د لا ښه حاکمیت او د ولسواکۍ د پیاوړتیا له پاره به په ګډه کار کوم او په دې لاره کې به هرې مشورې ته د قدر په سترګه ګورم  او هر سالم نقد به د ځان او کاري ټیم په ګټه بولم.

په پارلماني چارو کې د دولت د وزیر په توګه به مې لومړۍ هڅه دا وي چې د دغه نهاد د کړنو د موثریت او مثمریت د زیاتوالي او سیاسي پرسټیژ د لوړوالي له لارې د دولت د درې ګونو قواوو تر منځ څه ډول چې اړینه ده، لازمه همغږي رامنځته کړم.  

د دوی تر منځ به د شته قوانینو او مقررو پر بنسټ اړیکې داسې تأمین کړم چې تقابل خپل ځای تفاهم او همکارۍ ته پرېږدي او په دې توګه د افغانستان د اسلامي جمهوري دولت د نظام ماشین له بندښت پرته وچلېږي او زموږ لویو ملي اهدافو ته د رسېدو په لاره کې پراته خنډونه له منځه ولاړ شي. 

د یو سوکاله، ښیرازه او  قانونمند افغانستان  په هیله!

په درنښت

ضیاء الحق امرخېل

په پارلماني چارو کې د دولت وزیر